Biogassverkið fingið umhvørvisgóðkenning

Biogassverkið hjá P/F Förka fer at taka ímóti neytamykju frá landbúnaði og súrløgu av laksi og skarni frá smoltstøðum. Verkið hevur fingið umhvørvisgóðkenning til at taka ímóti upp til 50.000 tonsum av lívrunnum tilfari tilsaman. 

Vanliga fer verkið at taka ímóti tilfari allar yrkadagar, men um neyðugt t.d. vegna serligar umstøður í alivinnuni, kann virkið taka í móti størri nøgdum av súrløgu í vikuskiftum. Á verkinum er ein 1000 m³ ídnaðartangi til súrløgu.

Verkið framleiðir biogass allar tímar á árinum. Verkið hevur ein gassmotor, sum framleiðir ravmagn burtur úr biogassinum so hvørt. Hitin frá gassmotorinum kann brúkast til fjarhita ella til onnur endamál. Harafturat kann viðgjørda tilfarið brúkast til tøð í landbúnaði. 

Í málsviðgerðini er serligur dentur lagdur á, at seta virkinum krøv um at dálkandi evni ikki verða leidd út í umhvørvið og at ampar av lukti og óljóði vera so smáir sum gjørligt.

• Góðkenningina finnur tú her
• Almennu lýsingina um umhvørvisgóðkenningina finnur tú her. Har finnur tú eisini kæruvegleiðingina.

Um tú hevur spurningar ella viðmerkingar er tú vælkomin at ringja til Ingvard Fjallstein, telefon 342400, ella at senda okkum ein teldupost us@us.fo